كچێكى وه‌نه‌وشه‌یى

به‌بۆنه‌ى رۆژى (8) مارسه‌وه‌ رۆژى جیهانى ژنان، شانۆگه‌رى (كچێكی وه‌نه‌وشه‌یی) نمایشده‌كرێت.
ئه‌م شانۆییه‌ كه‌  به‌شی شانۆی په‌یمانگه‌ی هونه‌ره‌ جوانه‌كانى سلێمانی به‌هاوبه‌شی سه‌نته‌ری راگه‌یاندن و رووناكبیری ژنان  نمایشیده‌كه‌ن، له‌چیرۆكی مهاباد قه‌ره‌داخی-یه‌و داڕشتن و ده‌رهێنانی مۆفه‌ق عارف لهۆنی-یه‌و  بڕیاره‌ له‌ڕۆژانی (12/3 تا 14/3/2010) له‌هۆڵی په‌یمانگه‌ی هونه‌ره‌ جوانه‌كان نمایش بكرێت.
ئه‌و زوڵم و سته‌م و نایه‌كسانی و بێ مافییه‌ی كه‌ به‌رامبه‌ر ژنان ده‌كرێت و ئه‌و هه‌موو توندوتیژ و سوكایه‌تی و بێ رێزییه‌ی روبه‌ڕووی (ره‌گه‌زی مێ) ده‌بێته‌وه‌ هه‌وێنی ده‌ق و نمایشه‌كه‌ن كه‌ له‌نواندنی شه‌نیه‌ر حه‌مید، ماردین سه‌باح، لاڤه‌ ره‌سوڵ، رێژنه‌ رزگار، شه‌هرام عومه‌ر، شایی ره‌زا، دونیا عومه‌ر، سلیڤا هۆشیار، هاشم ئه‌كره‌م و یاریده‌ده‌ری ده‌رهێنه‌ر توانا فه‌رهادو سینۆگرافیاى ده‌رهێنه‌رو نیگاره‌كان نه‌سرین فه‌تاح و پۆسته‌رو ده‌لیل له‌لایه‌ن هه‌ڵۆ جه‌لال درووستكراوه‌، رووناكی توانا فه‌رهاد- رێكه‌وت عه‌بدول و جلوبه‌رگ و ماسك ئه‌ڤین غه‌ریب-ه‌.
له‌باره‌ى ئه‌م شانۆییه‌وه‌ هونه‌رمه‌ند مۆفه‌ق عارف لهۆنى وتى:  ئه‌و زوڵم و سته‌مه‌ به‌ناوی ئاین و داب و نه‌ریت و ده‌سه‌لات و تاكه‌كانی كۆمه‌ڵگاوه‌ ده‌كرێت، یان له‌ژێر چه‌تری هه‌رناو و گروپ و یاسایه‌كه‌وه‌ كرابێ ئاكامی هه‌ر پێشێڵكردنی مافه‌كان و جیاوازی جێنده‌ری و توندوتیژی و زوڵم و سته‌مه‌ (به‌رامبه‌ر ژنان) له‌م نمایشه‌دا، كه‌ پارێزه‌رێكی چیرۆكنوس و نیگاركێش به‌رده‌وام له‌كاره‌كه‌یدا بۆ چه‌واشه‌كردن باسی مافی مرۆڤ و ژنان و ئازادی و یه‌كسانی ده‌كات كه‌چی له‌ڕاستیدا خۆی یاساو مافه‌كان پێشێل ده‌كات و ئازادی (سه‌ر) ده‌بڕێ.